சென்னை, அயனாவரம் பகுதியில் பெண்ணின் செல்போனை பறித்துக் கொண்டு தப்பிய 2 கொள்ளையர்களை போலீசார் கைது செய்தனர். அவர்களிடம் இருந்து செல்போன் மற்றும் ஆட்டோ பறிமுதல் செய்யப்பட்டது.
சென்னை, கொளத்தூர், சிவசக்திநகரைச் சேர்ந்தவர் சாந்தி (36). நேற்று முன்தினம் மாலை அயனாவரம், ஆண்டர்சன் சாலை, கனரா வங்கி அருகில் செல்போனில் பேசியபடி நடந்து சென்றார். அப்போது பின்புறமாக ஆட்டோவில் வந்த 3 நபர்கள் சாந்தியின் செல்போனை பறித்துக் கொண்டு தப்பியோடி விட்டனர். உடனே, சாந்தி சத்தம் போட்டுக் கொண்டே ஆட்டோவை துரத்திச் சென்றார்.
சத்தம் கேட்டு பொதுமக்களும் சற்று தொலைவில் கண்காணிப்பு பணியிலிருந்த அயனாவரம் போலீசாரும் ஆட்டோரை விரட்டிச் சென்று மடக்கிப் பிடித்தனர். ஆட்டோவில் இருந்த ஒருவர் தப்பியோட மற்ற 2 நபர்கள் ஆட்டோவுடன் பிடிபட்டனர். அவர்களை அயனாவரம் போலீஸ் நிலையத்தில் வைத்து விசாரணை நடத்தினர். அதில் ஒருவர் சென்னை நம்மாழ்வார்பேட்டையைச் சேர்ந்த பார்த்திபன் (18), மற்றும் சூர்யா (வயது 24) என்பது தெரியவந்தது. அதனையடுத்து இருவரையும் போலீசார் கைது செய்து சாந்தியின் விவோ செல்போன் மற்றும் குற்றச் செயலுக்கு பயன்படுத்திய ஆட்டோவை பறிமுதல் செய்தனர். தப்பியோடிய மற்றொரு குற்றவாளியை போலீசார் தேடி வருகின்றனர்.
