ஆடி மாத பிறப்பையொட்டி கோவில்களில் சிறப்பு வழிபாடு

ஆடி மாத பிறப்பை முன்னிட்டு கிருஷ்ணகிரி மாவட்டத்தில் உள்ள மாரியம்மன் கோவில்களில் நேற்று சிறப்பு வழிபாடு நடந்தது. அதன்படி கிருஷ்ணகிரி புதுப்பேட்டை பெரிய மாரியம்மன் கோவிலில், அம்மனுக்கு அபிஷேகம் செய்யப்பட்டு சிறப்பு பூஜைகள் நடந்தன. அம்மன் சிறப்பு அலங்காரத்தில் பக்தர்களுக்கு அருள் பாலித்தார். பக்தர்கள் நெய் விளக்கேற்றி வழிபட்டனர். இதே போல் ராசுவீதி துளுக்காணி மாரியம்மன் கோவில், ஜோதி விநாயகர் கோவில் தெருவில் உள்ள முத்துமாரியம்மன் கோவிலில், அபிஷேகம், சிறப்பு பூஜைகள் செய்து வழிபாடு நடந்தன. இதே போல் மாவட்டம் முழுவதும் உள்ள அம்மன் கோவில்களில் நேற்று ஆடி மாத பிறப்பை முன்னிட்டு சிறப்பு பூஜைகள் நடந்தன. இதேபோன்று வேப்பனப்பள்ளி அருகே உள்ள பச்சமலை முருகன் கோவிலில் நேற்று சாமிக்கு சிறப்பு பூஜை நடந்தது. இதையொட்டி சாமி சிறப்பு அலங்காரத்தில் பக்தர்களுக்கு அருள் பாலித்தார். இதில் ஏராளமான பக்தர்கள் கலந்து கொண்டு சாமி தரிசனம் செய்தனர். அவர்களுக்கு அன்னதானம் வழங்கப்பட்டது.