நீர்நிலைகள் அமைந்துள்ள பகுதியில் வீட்டுமனை அமைக்க வழங்கப்பட்ட அனுமதியை ரத்து செய்க

நீர்நிலைகள் மற்றும் விவசாய நிலங்கள் அமைந்துள்ள பகுதியில் வீட்டுமனைப் பிரிவு அமைக்க வழங்கப்பட்ட அனுமதியை ரத்து செய்ய கோரிய வழக்கில் தமிழக அரசு பதிலளிக்க உயர் நீதிமன்றம் உத்தரவிட்டுள்ளது

சென்னை மேற்கு தாம்பரத்தை சேர்ந்த சேகர் சுயம்பு என்பவர் தொடர்ந்துள்ள பொது நல மனுவில், ஸ்ரீபெரும்புதூர் வட்டத்திற்குட்பட்ட எழுச்சூர் கிராமத்தில் உள்ள பெரிய ஏரி, இரண்டு குட்டைகள் மற்றும் அவற்றை ஒட்டியுள்ள விவசாய நிலங்களை நத்தம் நிலமாக மாற்றப்பட்டதாகவும், 60 ஏக்கருக்கும் மேற்பட்ட நிலத்தில் வீட்டுமனைப்பிரிவை அமைக்க சென்னை அண்ணா நகரை சேர்ந்த ஜூப்ளி பிளாட்ஸ் என்ற நிறுவனத்திற்கு 2019ஆம் ஆண்டு செப்டம்பரில் தமிழ்நாடு நகரமைப்பு துறை அனுமதி வழங்கியுள்ளதாகவும் குறிப்பிட்டுள்ளார்.

பொதுப்பணித்துறை மற்றும் கீழ் பாலாறு பாசனப் படுகை ஆகியவற்றின் கட்டுப்பட்டில் இருந்த இந்த விவசாய நிலத்தை வீட்டுமனைப்பிரிவுகளாக மாற்றுவதால் சுற்றுச்சூழலுக்கு பெருத்த பாதிப்பை ஏற்படுத்துவதாக அரசு துறைகள் மற்றும் மாவட்ட நிர்வாகத்திடம் அளித்த மனு மீது நடவடிக்கை எடுக்கவில்லை எனவும் குறிப்பிட்டுள்ளார்.

வீட்டுமனைப்பிரிவு அமைக்க வழங்கிய அனுமதியை ரத்து செய்ய வேண்டுமென்றும், அதுவரை மனைகளை விதிக்க தடை விதிக்க வேண்டுமென்றும் கோரிக்கை வைத்துள்ளார்.

இந்த வழக்கு நீதிபதிகள் மகாதேவன் மற்றும் ஆனந்தி அடங்கிய அமர்வில் விசாரணைக்கு வந்தபோது, வழக்கு குறித்து தமிழக அரசு துறைகள் 2 வாரங்களில் பதிலளிக்க உத்தரவிட்டு வழக்கு விசாரணையை தள்ளிவைத்துள்ளனர்.