உரிய ஆவணங்கள் இல்லாமல் சென்ட்ரல் ரயில் நிலையத்திற்கு கொண்டு வரப்பட்ட 6 கிலோ வெள்ளி பறிமுதல் செய்யப்பட்டது.
சட்டீஸ்கர் மாநிலம் பிலாஸ்பூரில் இருந்து சென்னை சென்ட்ரல் ரயில் நிலையத்திற்கு பிலாஸ்பூர் எக்ஸ்பிரஸ் இன்று காலை வந்தது. 4-வது நடைமேடைக்கு வந்ததும் சென்ட்ரல் ரயில்வே பாதுகாப்பு படை போலீசார் பயணிகளின் உடமைகளை சோதனை நடத்தினர். அப்போது விசாகப்பட்டினத்தில் இருந்து வந்த சந்தேகத்திற்குரிய நபரை தடுத்து நிறுத்தினர்.
அவரது பையை சோதனை செய்து பார்த்தபோது உரிய ஆவணங்கள் ஏதுமின்றி 6.190 கிலோ வெள்ளி இருப்பது கண்டுபிடிக்கப்பட்டது. இதையடுத்து அந்த நபரை சென்ட்ரல் ரயில்வே பாதுகாப்பு படை காவல் நிலையத்தில் வைத்து போலீசார் விசாரணை நடத்தி வருகின்றனர்.
