காங்கிரஸ் செயற்குழு இன்று கூடுகிறது: தொடர் தோல்வி குறித்து ஆலோசனை

—
பீகார் தேர்தல் உள்பட தொடர் தோல்விகளை சந்தித்துள்ள சூழலில், காங்கிரஸ் கட்சியின் செயற்குழு கூட்டம், காணொலி வாயிலாக இன்று நடைபெறுகிறது.

அண்மையில் நடந்து முடிந்த பீகார் சட்டசபை தேர்தல், பல மாநில இடைத்தேர்தல்களில் காங்கிரஸ் கட்சி பெரிய அளவில் வெற்றிபெறவில்லை. இதனால், அக்கட்சிக்குள் பெரும் குழப்பம் நிலவுகிறது.

இந்த பரபரப்பான சூழலில், அகில இந்திய காங்கிரஸ் செயற்குழுக் கூட்டம் இன்று காலை 11 மணிக்கு காணொலி மூலம் நடக்கிறது. கட்சியின் தலைவர் சோனியா காந்தி உடல்நலக் குறைவால் கோவா சென்றுள்ள சூழலில், செயற்குழுக்கூட்டம் நடைபெறும் என அறிவிக்கப்பட்டுள்ளது.

இக்கூட்டத்தில், அகமது படேல், தருண் கோகோய் உள்ளிட்டோரின் மறைவுக்கு இரங்கல் தெரிவிக்கப்படும். அதை தொடர்ந்து புதிய தலைவரை தேர்வு செய்வது, பீகார் தேர்தல் தோல்வி, தமிழகம் உள்ளிட்ட மாநிலங்களில் நடைபெறவுள்ள சட்டசபைத் தேர்தல் குறித்து விவாதிக்கப்படும் என்று தெரிகிறது.
—