நாகை மாவட்டம் வேதாரண்யம் மீனவர்களை தாக்கி ஒரு லட்ச ரூபாய் மதிப்புள்ள பொருட்களை இலங்கை கடற் கொள்ளையர்கள் பறித்துச் சென்றுள்ளனர்.
ஆறுகாட்டுத்துறையில் இருந்து 3 பைஃபர் படகுகளில் சென்ற 14 மீனவர்கள் கோடியக்கரைக்கு தென்கிழக்கே மீன் பிடித்து கொண்டு இருந்தனர். அப்போது அங்கு வந்த இலங்கை கடற் கொள்ளையர்கள், கத்தியை காட்டி மிரட்டி படகில் இருந்த டீசல், ஜி.பி.எஸ் கருவி, வலை, லைட், வாக்கி டாக்கி, பேட்டரி உள்ளிட்ட பொருட்களை பறித்து கொண்டு சென்றனர்.
பொருட்களை பறிகொடுத்த மீனவர்கள் கரை திரும்பி, கடலோர காவல் குழுமத்திடம் புகார் அளித்துள்ளனர். இலங்கை கடற்படையுடன், கடற்கொள்ளையர்களின் தாக்குதலும் சேர்ந்துள்ளதால் தமிழக மீனவர்கள் அச்சம் அடைந்துள்ளனர்.
