ஆஸ்திரேலியாவுக்கு எதிரான கிரிக்கெட் தொடரில் விளையாடும் இந்திய அணியில் மாற்றங்கள் செய்யப்பட்டுள்ளன. தமிழக வீரர் வருண் சக்ரவர்த்தி காயத்தால் விலகியதால், வேகப்பந்துவீச்சாளர் நடராஜன் சேர்க்கப்பட்டுள்ளார்.
இந்திய கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு, டெஸ்ட், ஒருநாள் மற்றும் டி20 கிரிக்கெட் போட்டிகளில் விளையாட உள்ளது. இதற்கான இந்திய அணியை கடந்த மாதம் 26ம் தேதி பிசிசிஐ தேர்வுக்குழு அறிவித்தது. ஆனால், அந்த அணியில் இடம்பெற்ற பல்வேறு வீரர்கள் காயத்தால் அவதிப்பட்டதையடுத்து, அணி திருத்தப்பட்டு புதிய வீரர்களின் பட்டியலை பிசிசிஐ இன்று அறிவித்துள்ளது.
அதன்படி, விராட் கோலி – அனுஷ்காவுக்கு 2021 ஜனவரி முதல் வாரத்தில் குழந்தை பிறக்கும் என்பதால், அந்த நேரத்தில் நடைபெறும் 3 டெஸ்ட் தொடரில் இருந்து, கோலிக்கு ஓய்வு அளிக்கப்பட்டுள்ளது. அடிலெய்ட் டெஸ்ட் போட்டியில் மட்டும் கோலி விளையாடுவார்.
காயத்தால் ரோஹித் சர்மாவின் உடல்நிலை தகுதி குறித்து வல்லுநர்கள் கண்காணித்து வருகின்றனர். அதனால் ஒருநாள், டி20 தொடரில் ரோஹித் சர்மாவுக்கு ஓய்வு அளிக்கப்பட்டு, டெஸ்ட் தொடரில் மட்டும் சேர்க்கப்பட்டுள்ளார்.
தமிழக வீரரும், சுழற்பந்துவீச்சாளருமான வருண் சக்ரவர்த்தி டி20 அணியில் சேர்க்கப்பட்டிருந்த நிலையில், தோள்பட்டை காயம் காரணமாக விலகியுள்ளார். அவருக்குப் பதிலாக தமிழக வேகப்பந்துவீச்சாளர் டி.நடராஜன் சேர்க்கப்பட்டுள்ளார்.
இந்திய டெஸ்ட் அணி விவரம்: விராட் கோலி (கேப்டன்), ரோஹித் சர்மா, மயங்க் அகர்வால், பிரித்வி ஷா, கே.எல்.ராகுல், சத்தேஸ்வர் புஜாரா, அஜின்கயே ரஹானே, ஹனுமா விஹாரி, சுப்மான் கில், விருத்மான் சாஹா, ரிஷப் பந்த், பும்ரா, முகமது ஷமி, உமேஷ் யாதவ், நவ்தீப் ஷைனி, குல்தீப் யாதவ், ரவிந்திர ஜடேஜா, ரவிச்சந்திர அஸ்வின், முகமது சிராஜ்.
ஒருநாள் அணி பட்டியல்: விராட் கோலி (கேப்டன்), ஷிகர் தவண், சுப்மான் கில், கே.எல்.ராகுல் (துணை கேப்டன்), ஸ்ரேயாஸ் அய்யர், மணிஷ் பாண்டே, ஹர்திக் பாண்டியா, மயங்க் அகர்வால், ரவிந்திர ஜடேஜா, யஜூவேந்திர சாஹல், குல்தீப் யாதவ், ஜஸ்பிரித் பும்ரா, முகமது ஷமி, நவ்தீப் ஷைனி, சர்துல் தாக்கூர். சஞ்சு சாம்ஸன்.
இந்திய டி20 அணி விவரம்: விராட் கோலி (கேப்டன்), ஷிகர் தவண், மயங்க் அகர்வால், கே.எல்.ராகுல் (துணை கேப்டன்), ஸ்ரேயாஸ் அய்யர், மணிஷ் பாண்டே, ஹர்திக் பாண்டியா, சஞ்சு சாம்ஸன், ரவிந்திர ஜடேஜா, வாஷிங்டன் சுந்தர், யஜூவேந்திர சாஹல், ஜஸ்பிரித் பும்ரா, முகமது ஷமி, நவ்தீப் ஷைனி, தீபக் சாஹர், டி.நடராஜன்.
