குஜராத்தில் 21ஆயிரம் கோடி மதிப்பிலான ஹெராயன் போதை பொருள் பறிமுதல் செய்த விவகாரத்தில் கைது செய்யப்பட்ட சென்னை தம்பதியினரின் வீட்டில் டெல்லி என்.ஐ.ஏ சோதனை நடத்தி வருகின்றனர்.
குஜராத் முந்த்ரா துறைமுகத்தில் கப்பல் வழியாக பவுடரை போல் கடத்த முயன்ற 2988.21 கிலோ ஹெராய்னை மத்திய போதை பொருள் புலனாய்வு பிரிவு அதிகாரிகள் பறிமுதல் செய்தனர். 21 ஆயிரம் கோடி ரூபாய் மதிப்பிலான இந்த போதை பொருளை ஆப்கானிலிருந்து ஈரானுக்கு கடத்த முயன்றது கண்டுபிடிக்கப்பட்டது.
இதனையடுத்து 2988.21 கிலோ ஹெராயன் பறிமுதல் செய்த வழக்கை டெல்லி என்.ஐ.ஏ அதிகாரிகள் தீவிர விசாரணையை தொடங்கி உள்ளனர். முதற்கட்டமாக டெல்லி என்.ஐ.ஏ அதிகாரிகள் 3 குழுக்களாக பிரிந்து டெல்லி, சென்னை, ஆந்திரா ஆகிய இடங்களுக்கு சென்று காலை 8 மணி முதல் விசாரணை மேற்கொண்டு வருகின்றனர். குறிப்பாக சென்னை கொளப்பாக்கம் வ.உ.சி தெருவில் வசித்து வந்த தம்பதியினரான மச்சாவரம் சுதாகரன், அவரது மனைவி துர்கா வீட்டில் 10-க்கும் மேற்பட்ட டெல்லி என்.ஐ.ஏ அதிகாரிகள் காலை 8 மணி முதல் சோதனை மேற்கொண்டு வருகின்றனர். மேலும் மச்சாவரம் சுதாகரனின் லேப்டாப் மற்றும் செல்போனை பறிமுதல் செய்து அதிலுள்ள ஆதாரங்களை வைத்து போதை பொருள் கடத்தலுக்கு உடந்தையாக இருந்தவர்கள் யார் என்பது குறித்து சோதனை நடத்தி வருகின்றனர்.
