குடிபோதையில் நண்பர்களுடன் ஏற்பட்ட மோதலில் கடலை வியாபாரி கத்தியால் குத்திக் கொலை செய்யப்பட்ட சம்பவம் சென்னை மாம்பலத்தில் பரபரப்பை ஏற்படுத்தியது.
சென்னை தி.நகர், நியூ போக் சாலையில் உள்ள தண்ணீர் டேங்க் அருகே கையில் கத்தியுடன், கழுத்தில் காயங்களுடன் சுமார் 30 வயது மதிக்கத்தக்க நபர் இறந்து கிடப்பதாக மாம்பலம் போலீசாருக்கு தகவல் வந்தது. உதவிக்கமிஷனர் கலியன் தலைமையில் போலீசார் சம்பவ இடத்திற்கு விரைந்து வந்தனர். அந்த நபரின் உடலை கைப்பற்றி பிரேத பரிசோதனைக்காக சென்னை, ராஜீவ்காந்தி அரசு ஆஸ்பத்திரிக்கு அனுப்பி வைத்தனர்.
இந்தச் சம்பவம் தொடர்பாக போலீசார் வழக்குப்பதிவு தீவிர விசாரணை நடத்தினர். இறந்து கிடந்தவரின் கையில் கத்தி இருந்ததால் அவர் தற்கொலை செய்து கொண்டிருக்கலாம் என போலீசார் சந்தேகப்பட்டனர். அந்த கோணத்தில் விசாரணையைத் தொடங்கிய போது இறந்த நபர் சைதாப்பேட்டையைச் சேர்ந்த கடலை வியாபாரி நாராயண மூர்த்தி (35) என்பது தெரியவந்தது. அதனைத் தொடர்ந்து போலீசார் நடத்திய விசாரணையில் நாராயணமூர்த்தியை யாரோ கழுத்தில் குத்திக் கொலை செய்திருப்பது தெரிய வந்தது.
சென்னை ஜாபர்கான் பேட்டையைச் சேர்ந்த நாகராஜன், காமேஷ், சஞ்சய், பாலாஜி, ரவி ஆகியோருடன் நாராயணமூர்த்தி நேற்று முன்தினம் இரவு மது அருந்தியுள்ளார்.
அப்போது மதுபோதையில் நாராயண மூர்த்தி நண்பர்களுடன் தகராறில் ஈடுபட்டுள்ளார். ஆத்திரத்தில் நாராயணமூர்த்தி மறைத்து வைத்திருந்த கத்தியை எடுத்து மிரட்டி உள்ளார். இதனால் ஆத்திரமடைந்த ரவி, நாகராஜன், சஞ்சய், பாலாஜி, காமேஷ் ஆகியோர் சேர்ந்து நாராயணமூர்த்தி வைத்திருந்த கத்தியைப் பிடுங்கி அவரை கழுத்தில் குத்தி கொலை செய்து விட்டு தப்பி விட்டனர் போன்ற தகவல்கள் தெரியவந்தது. அதனையடுத்து தலைமறைவாக இருந்த நாகராஜன், பாலாஜி, சஞ்சய், காமேஷ் ஆகியோரை மாம்பலம் போலீசார் கைது செய்தனர். ரவி என்பவர் தலைமறைவாகி விட்டார். அவரை போலீசார் தேடி வருகின்றனர்.
——–––––––––––––––––––––––––––––––––––––––––––––––––––––––––––––––––––––––––––––––––––––––––––––––
