வேகமாக வந்த லாரி மோதியதில் இருசக்கர வாகனத்தில் சென்றவர் பரிதாபமாக உடல் நசுங்கி பலியானார். அது தொடர்பாக குடிபோதையில் லாரி ஓட்டிய டிரைவரை போலீசார் கைது செய்தனர்.
சென்னை, கொளத்தூர், சிலந்தி கூட்டை, மோகனம் தெருவைச் சேர்ந்தவர் சுப்ரமணியம் (வயது 64). நேற்று முன்தினம் காலை 8.45 மணியளவில் தனது இருசக்கர வாகனத்தில் மணலி விரைவு சாலையில் சென்று கொண்டிருந்தார். அப்போது அந்த வழியாக பின்புறமாக டிரைலர் லாரி ஒன்று அதிவேகமாக வந்தது. சுப்பிரமணியம் சென்ற பைக்கின் முன்பக்கத்தில் லாரி இடித்தது. லாரி அதிவேகமாக மோதியதில் பைக்கில் சென்ற சுப்ரமணியம் நிலை தடுமாறி கீழே விழுந்தார்.
இதில் லாரியின் பின்சக்கரம் அவர் மீது ஏறி இறங்கியதில் சுப்பிரமணி சம்பவ இடத்திலேயே பலியானார். தகவல் கிடைத்ததும் மாதவரம் போக்குவரத்து புலனாய்வு பிரிவு போலீசார் சம்பவ இடத்துக்கு சென்றனர். சுப்ரமணியின் உடலை மீட்டு பிரேத பரிசோதனைக்காக சென்னை கீழ்ப்பாக்கம் அரசு ஆஸ்பத்திரிக்கு அனுப்பி வைத்தனர். இது தொடர்பாக போலீசார் 304 ஏ பிரிவின் கீழ் வழக்குப்பதிவு செய்து லாரி டிரைவர் நெல்லை, பேட்டை, அண்ணாநகர் மேற்கு தெருவைச் சேர்ந்த ஆதாம் பாவா ஜாமியூ (31) என்பவரை கைது செய்தனர். விசாரணையில் அவர் லாரி ஓட்டிய போது மது போதையில் இருந்ததுள்ளது தெரியவந்தது. அவர் விசாரணைக்குப்பின்னர் கோர்ட்டில் ஆஜர்படுத்தப்பட்டு சென்னை புழல் மத்திய சிறையில் அடைக்கப்பட்டார்.
