சென்னை நுங்கம்பாக்கத்தில் பைக்கில் வந்த இரண்டு இளைஞர்கள் நிலை தடுமாறி சாலை தடுப்பில் மோதியதில் கீழே விழுந்து தலையில் பலத்த அடிபட்டு பரிதாபமாக பலியானார்கள்.
சென்னை கோடம்பாக்கம், சிஆர்பி கார்டனைச் சேர்ந்த அஜித்குமார் (வயது 19), மற்றும் அவரது நண்பர் திநகரைச் சேர்ந்த அஜய். இருவரும் நேற்று இரவு 10 மணியளவில் பல்சர் பைக்கில் வெளியில் சென்றார். அஜித்குமார் தலையில் ஹெல்மெட் அணிந்தபடி பைக்கை ஓட்ட அஜய் பின்னால் அமர்ந்திருந்தார்.
வள்ளுவர்கோட்டம், சுதந்திரதின பூங்கா அருகில் வந்தபோது பைக் திடீரென நிலைதடுமாறி பிளாட்பாரத்தின் மேல் ஏறி அங்கிருந்த சிறிய தடுப்புத்தூண் மீது மோதியது. இதில் இருவரும் நிலைதடுமாறி கீழே விழுந்தனர்.
பைக்கின் பின்னால் அமர்ந்திருந்த அஜய் தலையில் அடிபட்டு சம்பவ இடத்திலேயே ரத்தவெள்ளத்தில் பலியானார். பைக்கை ஓட்டிய அஜித் குமார் தலையில் பலத்த காயங்களுடன் ராயப்பேட்டை ஆஸ்பத்திரிக்கு கொண்டு சென்ற போது வழியிலேயே உயிரிழந்தார். இந்தச் சம்பவம் தொடர்பாக தகவல் கிடைத்ததும் பாண்டிபஜார் போக்குவரத்துப் புலனாய்வுப்பிரிவு போலீசார் விசாரணை நடத்தி வருகின்றனர்.
