நடிகர் விஜய் நடிப்பில் உருவான மாஸ்டர் திரைப்படம், வரும் தீபாவளிக்கு திரையிடப்படவில்லை என்று, அதன் தயாரிப்பாளர் தெரிவித்துள்ளார்.
பிகில் படத்தை தொடர்ந்து விஜய் நடித்துள்ள அடுத்த படம் மாஸ்டர். இந்த படத்தை மாநகரம், கைதி உள்ளிட்ட படங்களை இயக்கிய லோகேஷ் கனகராஜ் இயக்கியுள்ளார். இப்படத்திற்கு அனிருத் இசை அமைத்துள்ளார். விஜய்சேதுபதி, ஷாந்தனு, மாளவிகா மோகனன் உள்ளிட்டவர்களும் இதில் நடித்துள்ளனர்.
விஜய் ரசிகர்கள் ஆவலுடன் எதிர்ப்பார்த்திருந்த இத்திரைப்படம், கடந்த ஏப்ரல் மாதம் தமிழ் புத்தாண்டை ஒட்டி திரைக்கு வரவிருந்தது. ஆனால், கொரொனா தொற்று பரவலால் ஊரடங்கு பிறப்பிக்கப்பட்டு திரையரங்குகள் அனைத்தும் மூடப்பட்டு இருந்தன.
எனவே, திரையரங்குகள் திறக்கப்படும் வரை மாஸ்டர் படம் வெளியாகாது; ஓடிடியில் வெளியிடப்போவதில்லை என்று படக்குழு திட்டவட்டமாக முன்பே தெரிவித்திருந்தது. தற்போது திரையரங்குகள் திறக்கப்படவுள்ளதால், தீபாவளிக்கு மாஸ்டர் படம் ரிலீஸ் ஆகுமா என்ற எதிர்பார்ப்பு எழுந்தது.
ஆனால், வரும் தீபாவளிக்கு மாஸ்டர் படம் வெளியாகாது என்று, படத்தின் தயாரிப்பாளர் லலித்குமார் தெரிவித்துள்ளார். தற்போது திரையரங்குகளில் உரிமையாளர்களுக்கும், தயாரிப்பாளர்களுக்கும் இடையே பனிப்போர் நிலவி வருகிறது.
அத்துடன், உலகளவில் திரையரங்குகள் இன்னமும் மூடப்பட்டுள்ளதால் சர்வதேச அளவில் இப்படத்தை ரிலீஸ் செய்ய முடியாத சூழல் உள்ளது. எனவே, தயாரிப்பு நிறுவனம் இந்த முடிவுக்கு வந்துள்ளதாக கூறப்படுகிறது.
