இன்று 2,708 பேருக்கு கொரோனா… தமிழகத்தில் தொடர்ந்து இறங்குமுகம்!

தமிழகத்தில் இன்று 2,708 பேருக்கு கொரோனா தொற்று கண்டறியப்பட்டுள்ளதாக, தமிழக சுகாதாரத்துறை செய்திக்குறிப்பு தெரிவித்துள்ளது.

இது தொடர்பாக தமிழக சுகாதாரத்துறை இன்று மாலை வெளியிட்ட செய்திக்குறிப்பில் தெரிவித்திருப்பதாவது:

தமிழகத்தில் இன்று ஒரேநாளில் 2,708 பேருக்கு கொரோனா தொற்று இருப்பது பரிசோதனைகளில் கண்டறியப்பட்டுள்ளது. இதன் மூலம் மொத்த எண்ணிக்கை 7,11,713 ஆக அதிகரித்துள்ளது.

சென்னையில் இன்று ஒரே நாளில் 747 பேருக்கு கொரோனா தொற்று உறுதியாகியுள்ளது. சென்னையில் இதுவரை 1,96,378 பேர் பாதிக்கப்பட்டுள்ளனர். 1,83,923 பேர் குணமடைந்து வீடு திரும்பியுள்ளனர். சென்னையில் இன்று 7 பேர் கொரோனாவிற்கு பலியானதால், மொத்த உயிரிழப்பு 3,599 ஆக உள்ளது.

தமிழகத்தில் கொரோனாவில் இருந்து இதுவரை 6,71,489 பேர் குணமடைந்துள்ளனர். அதேபோல், மருத்துவமனைகளில் இருந்து இன்று 4,014 பேர் விடுவிக்கப்பட்டுள்ளனர்.

கொரோனா தொற்றினால் 29,268 பேர் மருத்துவமனைகளில் சிகிச்சை பெற்று வரும் சூழலில், இன்று மட்டும் தமிழகத்தில் கொரோனாவால் 32 பேர் உயிரிழந்துள்ளனர்.

இதில் 14 பேர் தனியார் மருத்துவமனைகளிலும், 18 பேர் அரசு மருத்துவமனைகளிலும் உயிரிழந்துள்ளனர். இவர்களையும் சேர்த்து மொத்த உயிரிழப்பு 10,956 ஆக உயர்ந்துள்ளது.
—